De boer van t Zuderdaip

deur Henry Hes
(ISBN 90 72117 02 6)

Kwart over vare, n zwoele nacht, daip in augustus. De veurdeurbelle jankte deur t huus, raauw en onnuur.
Even was t n zetje stil.
Dou klonk in de verte de broesende bellen van de buren in t zulfde blok. Eerst linksonder, dou doarnoast, dou doar liek onder, dou doarnoast, tot beneden bie d'hoofd­deure. Gain mins dee open.
De deurbelder stapte even noar t midden van de stroade. n Lichtblaauw spiekerjek en n widde boksem gaven de laange donkere vent, doeknekt, mit n beetje gries hoar, n zulvern schiensel in t licht van n stroat­lanteern. Dou kletterde, zunder woarschaauwen, n roege regenbuie over de doaken en veegde alle stainen glad. De deurbelder draaide zuk om en luip mit n lözze tred noar de lichten in de verte, noar t Zuderdaip.
Henry Hes, schriever van verhoalen, verhoalen woarin aan niks en gainaine n concessie doan wordt. Wel is dat toch, dij Henry Hes?

Biewaarkt op 21-04-06

 

Ie kinnen 'De boer van t Zuderdaip' kopen deur € 8,00 over te moaken op giro 170 44 60 van Stichting Krödde in Groningen. Ie kinnen t ook bestellen deur n e-mail te sturen noar info@krodde.nl

Signalement: Gezet postuur, ongeveer 1,75 m groot, klaaine blaauwe wotterge ogies, rond heufd mit ronde rooie wangen, lange grieze regen­jazze mit gulpsloeten, broene stuutsiekoorden boksem, klödde mit oorkleppen, gele klompen. Leeftied: ongeveer viefteg joar. Lopt stoer en langzoam.
"Ast mie vroagst, is t n boer," zee de kommesoares, "De kriminaliteit rukt op van t pladdeland noar de stad."
Goan we verder: Slachtoffer. Alle draie vonden mit n henneptaauw om de strödde, sporen van koumizze an de schounen.
"Laai is e nait," zee de kommesoares, "draie wiest op waarklust."
Goan we verder: Ploatse. Alle draie binnen ze vonden veur de deure van de twaidehands-meubelwinkel op de houke van t Zuderdaip en de Folkenstroade. Smoord. Doarbie is gain spatje bloud vergoten. Doader wait hou of e knienen stropen mot.
"Waist wat," zee de kommesoares tegen de hoofdagent dai veur zien bero ston, "dit nuimen wie t geval De boer van t Zuderdaip, en ik heb zo'n gevuil dat dit geval oetlopt op n congres van dörpsveldwachters.
Dit haar e nog nait zegd, of de deure vloog open en agent Kloprogge stoof noar binnen mit n rood heufd. "Naie anwiezens, kommesoares," raip e.
"Wat veur? Vlug, vlug!" zee de kommesoares.
"We hebben n tude snapt op t Zuderdaip," zee Kloprogge.
"Docht ik t nait," zee de kommesoares, "De doader lopt op twai bainen en is n koal plukte tude mit pladde noagels. Hailemoal volgens Plato. Zo komen wie nait verder. En, agent Kloprogge, dit zeg ik veur de leste moal: dou de deure achter dien kont dicht!"
Inderdoad: de boer van t Zuderdaip hebben ze, ondanks t signalement, nooit pakt.