n Doalders wicht
Woar of ik an t zuken waas, har ik niks deur en k luusterde met n haalf oor wat noar de haarde meziek. Pas toen ik zulf ofreken wol, heurde ik de verkoper met heur onneren. Hij gaf t wicht tot n poar moal toe de twee CD's ien e hand en zij gaf ze lieke gaauw weerom. "k Huuf ze ja niet vergees met, man, t scheelt allent twee kwartjes t stuk," mor de vent achter de kassa wol dat ze beide CD's weerom ien e bak zette....
Proatend lopt ze n haalve stap veur me uut, veurbij t plietsieburo, over t gras van e singel met de bluiende kastanjebomen ien e oavendzun. Achter heur an goa k beide trappen omhoog, an e muren hangen ploaten en van goenent bennen één of meer hoeken lös. Kalk zit er achterop bakt. De koamer is toch nog oareg roem en deur t dakroam schient weer t oavendlicht. Het wichtje scharrelt wat deur de koamer, tussendeur hoalt ze één van e nije CD's uut t puutje. Bij t eerste geluud blift ze stoan, met e rug noar me toe. Deur t broene hoar zie ik de leste zun. As ik op e burostoel zitten goa, trekt ze me der an e maauw weer òf om krekt doar te zuken, mor tussen de boeken en t pepier lijt gien beurs of zuks wat. Wel komt er n bruukt kovviekopke onder kraant vot. Geliek zet ze t apperoatje an, zunder te vroegen of k zin an kovvie heb. Ientussen klinkt de meziek deur de koamer, lieke haard as ien e ploatenwinkel. Alles ien heur luustert der noar.
...
Mörns, noadat de wekker oflopt, smeer ik gaauw n plak stoet, sloep de trap òf om heur niet wakker te moaken en zie dan geliek heur opvaarfde doamesfiets. t Slöt gijt min open en bij t votfietsen kiek ik nog es noar boven. Ze slept toch niet en dut t roam open. "Weerom brengen hur," lacht ze, "drie keer bellen." Onderweegs noar de stad keer k ieneent haard weerom, noar heur huus. Onder de bel hangen drie bordjes en op t onderste stijt: Janny 3× bellen.
Biewaarkt op 21-04-06